Publikohen Rezultatet Paraprake të Regjistrimit të Popullsisë (ReKos2024)

12.07.2024

Agjencia e Statistikave të Kosovës (ASK) sot publikoi të dhënat paraprake të Regjistrimit të Popullsisë, Ekonomive Familjare dhe Banesave (ReKos 2024).

Për publikimin e Rezultateve Paraprake të Regjistrimit të Popullsisë (ReKos 2024) u organizua një Konferencë ndërkombëtare, ku morën pjesë përfaqësues të lartë të Qeverisë së Kosovës, përfshirë Kryeministrin Albin Kurti, përfaqësues të lartë të Organizatave të Kombeve të Bashkuara, përfaqësues të lartë të ambasadave dhe organizatave të huaja në Kosovë, ekspertë vendorë e ndërkombëtarë, kryetarë të komunave dhe të tjerë.

Të dhënat paraprake përfshijnë: numrin e popullsisë në nivel vendi dhe komune të ndarë sipas gjinisë, moshës mesatare, dendësisë së popullsisë në km², numrin e banesave.

Sipas rezultateve paraprake të Regjistrimit të Popullsisë (ReKos 2024), numri i popullsisë rezidente në Kosovë është 1 586 659, prej tyre 795 046 janë meshkuj dhe 791 614 femra.

Sipas të dhënave paraprake të ReKos 2024, mosha mesatare është 34.82 vjeç (rritje për 4.85 vjet), krahasuar me vitin 2011, ku mosha mesatare e popullsisë ishte 29.97 vjeç.

Dendësia e popullsisë në 1 km² është 145.5 banorë (2024), krahasuar me 159.5 banorë (2011). Komunat me dendësinë më të madhe janë: Fushë Kosova me 762 banorë, Mamusha me 513 banorë dhe Prishtina me 434 banorë në 1 km². Kurse komunat me dendësi më të vogël janë: Novobërda me 22 banorë, Ranillugu me 32 banorë dhe Shtërpca me 44 banorë në 1 km².

Për numrin e banesave në nivel komuna prijnë Prishtina, Prizreni dhe Ferizaj.

Nga gjithsej 38 komunat e Kosovës, 9 prej tyre kishin rritje të numrit të popullsisë, kurse 29 të tjera kishin zvogëlim të numrit të popullsisë.

Numri i Ekonomive Familjare në nivel vendi ishte 353 702 në vitin 2024, krahasuar me 297 090 sa ishin në vitin 2011. Numri mesatar i anëtarëve në një ekonomi familjare është 4.5 banorë në vitin 2024, krahasuar me 5.9 banorë në një ekonomi familjare sa ishte në vitin 2011 (zvogëlim për 1.4 banorë).

Regjistrimi i Popullsisë (ReKos 2024) u zhvillua në të gjitha komunat e Republikës së Kosovës. Mbi 99.8% e objekteve të kodifikuara duke përfshirë edhe ato të reja u mbuluan nga Regjistrimi.

Në 4 komunat veriore të Kosovës: Leposaviq, Zubin Potok, Zveçan dhe Mitrovicë pati bojkotim në masë të madhe, përkundër që një pjesë e tyre u regjistruan.

Cilësia e të dhënave - Është shumë më e lartë krahasuar më Regjistrimin e kaluar. Teknologjia e aplikuar, sistemi i monitorimit dhe shfrytëzimi i burimeve të tjera paraprake ndihmuan në cilësi.

Anketa Pas Regjistruese - Fokus ka mbulueshmërinë dhe do të identifikojë nëse ka pasur nën-regjistrim ose mbi-regjistrim të popullsisë.

Projekti i Regjistrimit të Popullsisë, Ekonomive Familjare dhe Banesave (ReKos2024) është një nga projektetet më madhore të një vendi në kohë paqeje, i realizuar nga 05 Prill deri më 24 maj 2024.